Somali poytaxtida mehmonxonaga uyushtirilgan hujum oqibatida 15 kishi halok bo‘ldi

Somali poytaxti Mogadishoda “Ash-Shabob” terrorchi guruhi mehmonxonaga hujum uyushtirdi. Bu haqda “RBK” xabar bermoqda.

Avvaliga mehmonxona yaqinida avtomobil portlatib yuborildi, shundan so‘ng bino ichiga qurollangan jangarilar kirib, odamlarni garovga oldi. Hujum oqibatida kamida 15 kishi, asosan tasodifiy o‘tkinchilar va mehmonxona qo‘riqchilari halok bo‘ldi. Yana 25 kishi turli darajada jarohat oldi.

Huquq-tartibot xodimlari mehmonxonaga kirib, kamida ikki jangarini o‘ldirishga muvaffaq bo‘ldi. Terorchilarning umumiy soni hozircha ma’lum emas. Guruh vakili Reuters agentligiga hujumni bu mehmonxonada Somali hukumati a’zolari tez-tez bo‘lib turishi bilan tushuntirdi. Biroq guvohlar jangarilar muassasada yashayotganlarga qarata tartibsiz o‘q uzganini ta’kidlamoqda.

Eslatib o‘tamiz, oldinroq Somali poytaxti markazida portlash va o‘q ovozlari eshitilayotgani ma’lum qilingandi.