Fransiyada davom etayotgan 2016-yilgi Yevropa Chempionatining Polsha va Shveysariya termalari o‘rtasidagi o‘yini penaltilar seriyasiga qadar yetib bordi va unda zafar quchgan Polsha chorak finalning birinchi ishtirokchisiga aylandi.
Uchrashuvning 39-daqiqasida Yakub Blashikovski Polsha terma jamoasini hisobda oldinga olib chiqdi. “Fiorentina” klubi vakili guruh bosqichining 3-turida Ukraina darvozasini ham ishg‘ol qilishga muvaffaq bo‘lgandi.
Polsha termasi a’zolari hisobni 82-daqiqaga qadar ushlab turdi. Aynan mana shu daqiqada “Stok Siti” a’zosi Jerdan Shaqiri muvozanatni tiklashga muvaffaq bo‘ldi — 1:1. Polsha terma jamoasining “Suonsi”da harakat qiladigan darvozaboni Lukash Fabianski guruh bosqichi doirasidagi 270 daqiqa davomida birorta ham gol o‘tkazmagandi.
Angliyalik hakam Mark Klattenburg boshqarib borgan o‘yin 120 daqiqa davom etganiga qaramay, unda g‘olibni aniqlab bo‘lmadi hamda navbat penaltilar seriyasiga berildi.
Penaltilar seriyasida Shveysariya a’zosi Granit Jaka noaniq zarba yo‘lladi. Polsha terma jamoasi safida esa 11 metrlik nuqtaga yaqinlashgan hamma futbolchilarning zarbasi aniq ko‘rinish oldi. Gjegoj Krixovyak tomonidan berilgan so‘nggi zarba Shveysariyani turnirdan chiqarib yubordi.
[wpse_match id="368864" show_title=1]
Izoh (0)