Fotogalereya: dunyoning eng ekstremal mehmonxonalari

Dunyoda shunday mehmonxonalar borki, ularda faqat ekstremal sarguzasht ishqibozlarigina tunab qola oladi. Quyidagi fotojamlanmadan ana shunday muassasalar o‘rin olgan.

Shanty Hotel

Bir qarashda yarim vayrona kulbaga o‘xshab turgan bino aslida besh yulduzli mehmonxonadir. JARning sud poytaxti Blumfonteyn yaqinida joylashgan muassasaning shiori — “Dunyodagi yagona poli qizdiriluvchi xaroba”.

Garajga o‘xshab turgan xonalardagi sharoit ham shunga yarasha: mebel va texnika minimal darajada, hojatxona — ko‘chada. Ovqat an’anaviy afrikacha o‘choqda pishiriladi.

Bunday garajning bittasida tunab qolish uchun sayyoh 75 dollar to‘lashiga to‘g‘ri keladi. Nonushta 10 dollar turadi. Mehmonxona hududida bepul Wi-Fi va spa-markazlar bor.

Dasparkhotel

Bu mehmonxona esa mijozlarga yuqorisidagidanam qiziqroq sarguzashtni taklif qiladi — garajda emas, kanalizatsiya quvurida yotib qolish.

Avstriyada joylashgan mehmonxona tejamkor turistlar va ochiq osmon ostidagi hayot shinavandalariga mo‘ljallangan. Xona vazifasini bajaruvchi quvur diametri — 2 metr. Derazalar shiftda joylashgan. Xonaga faqat bitta yotoq joyi sig‘adi.

Malmaison Oxford

Viktoriya asri qamoqxonasi binosida tashkil etilgan muassasada bir kecha tunab qolish narxi — 125 funt sterling.

Alcatraz

Germaniyaning Alcatraz mehmonxonasi ham qamoq shaklidadir. Uning yuqoridagi raqobatchisidan asosiy farqi narxidadir — bu yerda 50 yevro evaziga qolish mumkin.

Bundan tashqari, Alcatraz’da tanlov kattaroq: mijozlar qamoqxona kamerasi shaklidagi xonalarni yoki barcha qulayliklarga ega standart xonalarni tanlashi mumkin.

Liberty

Bostondagi Charlz-Strit qamoqxonasi o‘zining “mehmonlari” — jamoat arbobi Malkolm Iks, italiyalik anarxistlar Sakko va Vansetti bilan mashhur. Bugun binoda dunyoning eng shinam mehmonxonalaridan biri joylashgan.

Mehmonxonada bir kecha turish uchun tashrifchi 550 sarf qilishiga to‘g‘ri keladi.

Yana bir qiziq fakt shundaki, bir paytlar qamoqxona bo‘lgan binoning bugungi nomi Liberty — ozodlik.

Crazy House

Vyetnamdagi Crazy House mehmonxonasi esa bir paytlar jinnixona bo‘lgan. Undagi ikki o‘rinli xonalar 30 dollarga taklif qilinadi.

Bino me’mori — Vyetnam kompartiyasi sobiq bosh kotibining qizi Dang Vyet Nga.

Propeller Island City Lodge

Berlinda joylashgan Propeller Island City Lodge mehmonxonasi yanada qo‘rqinchliroq konsepsiyaga ega — uning tashrifchilari tobutda tunab qolishi mumkin.

Mehmonxona Jyul Vernning Propeller Island romani sharafiga shunday nomlangan.

Tobut — Propeller Island City Lodge mijozlariga taklif etiladigan yagona “qulaylik” emas. Aytaylik, o‘tkir hissiyot ishqibozlari gilyotina ostida yoki sher qafasida tunab qolishi mumkin. To‘g‘ri, ular haqiqiy emas — qafas ichida sher yo‘q, gilyotina esa tegishli shakl berilgan chiroqdan boshqa narsa emas.