“UzReport” telekanalida Yevro—2016 bellashuvlarini sharhlab borayotgan aktyor va xonanda Alisher Uzoqov haqida “Sabo” nashrida maqola chop etilgan bo‘lib, unda Uzoqovning sharhiga tanqidiy fikrlar yog‘dirilgan deb xabar berdi “Darakchi” sayti.
“Sabo”da qayd etilishicha, Alisher Uzoqovning sharhiga nisbatan qoldirilgan izohlarda aktyorning haddan ziyod ehtirosga berilib, gol bo‘lgan vaziyatlarda baqirib yuborayotganligi ko‘rsatib o‘tilgan.
“Muxlislar Alisher Uzoqovdan pastroq ovozda gapirib, baqir-chaqir qilmasa, undan yaxshi sport sharhlovchisi chiqishini bildirgan”, — deb yozdi “Darakchi” gazetasi. Tanqidiy fikrlar qayerda va qay ko‘rinishda yozilganiga oydinlik kiritilmagan.
“UzReport” sharhlovchilari haqida “Erudit Sport” gazetasida ham maqola chop etilgan bo‘lib, muallif Alisher Uzoqov haqida shunday fikr qoldirgan:
“Uzoqovni shaxsan tanimayman, yaqinligim yo‘q. Menga uning kinodagi rollari ma’qul bo‘lmagan, alohida kuzatib bormaganman. Biroq futbolga bo‘lgan qiziqishi haqida ‘Istiqlol’da o‘ynab yurgan paytlari bilardim. ‘UzReport’dagi sharhini eshitdim. Ikkinchi sharhi vaqtida esa menda iliq taassurot qoldirgani haqida tvit yozdim. Davron Fayziyev bilan tandemda muxlisni o‘yinga qiziqtira oldi. Futbol sharhlashi haqida eshitganimda, undan bunday sharh kutmagandim ochig‘i”.
“Uzoqovning bazasi u qadar boy emas, bunisi tu
shunarli. U futbol uchrashuvlarini uzoq yillardan buyon sharhlab yurgan emas, muxlis sifatida kuzatgan. Tajriba esa vaqti bilan keladi. Muhimi undagi temp, o‘yinga qiziqtira olish, futboldagi voqealar ichiga kirib ketish kabi qobilyatlarni o‘zim uchun kashf qildim. Bu sharhlovchi uchun juda muhim. Xatolar esa har doim hammada bo‘ladi”.
Ma’lumot uchun, “UzReport” telekanali sharhlovchilaridan kimning sharhi muxlislarga ko‘proq ma’qul bo‘layotgani yuzasidan “Daryo”da so‘rovnoma o‘tkazgan bo‘lib, unda ovoz bergan o‘quvchilarning 72 foizi Alisher Uzoqovning sharhini ma’qullagan.
Izoh (0)