Xitoyning Szyansu provinsiyasidagi Yanchen shahri va boshqa tumanlarda dovul qurbonlari soni 98 kishiga yetdi, deb yozadi “TASS” “Sinxua” agentligiga tayanib. Yana qariyb 800 kishi jarohatlandi.
Dovul Szyansu provinsiyasining bir nechta tumanlariga kuchli jala va do‘llar bilan birga 23-iyun, payshanba kuni yopirildi. Guvohlar so‘zlariga ko‘ra, shamol avtomobillarni ag‘darib yuborgan, daraxtlarni sindirgan va uy tomlarini uchirib ketgan.
Hukumat jabrlangan tumanlarga gumanitar yordam, jumladan, mingga yaqin chodir va 2 mingta karavot jo‘natdi.
Meteorologlar ma’lumotlariga ko‘ra, shamol shiddati ba’zi tumanlarda soniyasiga 35 metrga yetgan. Yanchen shahridagi ushbu dovul 1966-yildan buyon eng kuchlisi bo‘ldi.
Izoh (0)