2016-yil 23-iyun kuni Toshkentda Shanxay hamkorlik tashkiloti doirasida Banklararo birlashma Kengashining XII majlisi bo‘lib o‘tdi.
ShHT Banklararo birlashmasi majlisida “Qozog‘iston Taraqqiyot banki”, “RSK banki” (Qirg‘iziston), “Xitoy Davlat taraqqiyot banki” korporatsiyasi, “Taraqqiyot va tashqi iqtisodiy faoliyat banki” davlat korporatsiyasi (Rossiya), “Amonotbank” Davlat jamg‘arma banki (Tojikiston), O‘zbekiston Respublikasi Tashqi iqtisodiy faoliyat milliy banki vakillari ishtirok etdi, shuningdek, “Belarusbank” jamg‘arma banki, Habib Bank Limited (Pokiston) va Mo‘g‘uliston Taraqqiyot banki sherik banklar sifatida qatnashdi.
Majlis davomida ShHT BB Kengashiga raislik qiluvchi O‘zmilliybank raisligi ostidagi ishlarning mazkur bosqichda erishilgan natijalar to‘g‘risida chiqishi, shuningdek, ShHT BBga sherik banklarning vakillari va boshqa Kengash a’zolarining joriy va istiqboldagi faoliyat masalalari yuzasidan chiqishlari tinglandi. Tomonlar investitsiya loyihalarini birgalikda moliyalashtirish, ShHT makonida va Osiyo mintaqasida faoliyat olib borayotgan xalqaro moliya institutlari bilan o‘zaro aloqalarni rivojlantirish sohasida hamkorlikni faollashtirish muhimligini ta’kidladi, shuningdek, o‘rta muddatli istiqbolda ShHT BBni yanada rivojlantirish strategiyasini ishlab chiqish masalalari muhokama qilindi.
BB majlisida tomonlar so‘nggi yillarda ShHT kuzatuvchi davlatlari va dialogi bo‘yicha sheriklarning moliyaviy institutlari bilan o‘zaro aloqalari rivojlanayotganidan qoniqayotganligini bildirdi. Majlis davomida Mo‘g‘uliston Taraqqiyot bankiga ShHT BBga sherik bank maqomini berish to‘g‘risida qaror imzolandi.
Majlis yakunlari bo‘yicha 2016-yil 26-oktabrdan 2017-yil 25-oktabrgacha bo‘lgan muddatda ShHT BBga rais bank etib Qozog‘iston Taraqqiyot banki nomidan B. B. Jamishev saylandi.
Izoh (0)