McDonald’s tarmog‘iga Xitoy va Gonkongdagi biznesini sotishi uchun 3 mlrd dollar taklif etildi

McDonald’s tez ovqatlanish tarmog‘i Xitoy va Gonkongdagi biznesini sotish yuzasidan bir necha takliflar oldi. Bu haqda “RBK” xabar bermoqda.

Reuters manbalariga ko‘ra, kompaniya Xitoyning Beijing Tourism Group, Sanpower va ChemChina kabi yirik korporatsiyalaridan taklif olgan. Kelishuv amalga oshgan taqdirda uning summasi 3 milliard dollarni tashkil etishi mumkin.

Kompaniya shu yil mart oyida yaqin besh yil mobaynida Xitoy, Gonkong va Janubiy Koreyada 1,5 mingdan ortiq restoran ochish rejalarini e’lon qilgandi. Hozirda McDonald’s ushbu mamlakatlarda 2,8 ming restoranga ega. Tarmoq bosh direktori Stiven Isterbrukka ko‘ra, McDonald’s Xitoyni restoranlar soni bo‘yicha AQShdan keyingi ikkinchi mamlakatga aylantirish niyatida.