“Faol yoshlar maktabi” loyihasining rasmiy sahifasi o‘z ishini boshladi

“Faol yoshlar maktabi” loyihasining rasmiy sahifasi o‘z ishini boshladi, maktabga a’zolik davom etmoqda. Bu haqda “Daryo” mobil muxbiri ma’lum qildi.

“Faol yoshlar maktabi” a’zoligiga oliy ta’lim muassasalari talabalari va uyushmagan 18—30 yoshgacha bo‘lgan yoshlar qabul qilinishi mumkin.

Maktab a’zoligiga da’vogar talaba anketani topshirish vaqtida uning oliy ta’lim muassasasidagi so‘nggi o‘quv semestrida umumiy o‘zlashtirishi 80 foiz (semestrdagi barcha to‘plangan reyting ballari qo‘shilib, umumiy semestrdagi fanlar soniga bo‘linganda) va undan yuqori bo‘lishi shart.

Maktab a’zoligiga qabul qilish jarayoni uch bosqichda amalga oshiriladi:

• ariza-anketa bilan murojaat etish;
• anketa ma’lumotlari asosida ikkinchi bosqichga o‘tgan yoshlar test yordamida sinovdan o‘tkaziladi;
• test sinovlaridan ijobiy natija bilan o‘tgan a’zolikka da’vogarlar maxsus komissiya tomonidan suhbatdan o‘tkaziladi hamda suhbatdan muvaffaqiyatli o‘tgan yoshlar maktab a’zoligiga qabul qilinadi.