Putin topshirig‘iga ko‘ra tuzilgan Rossiyada texnologiyalarni rivojlantirish dasturiga teleportatsiya kiritildi

Rossiya prezidenti Vladimir Putin topshirig‘i bilan Strategik tashabbuslar agentligi (STA) tomonidan tuzilgan “Milliy texnologik tashabbus” (MTT) dasturida Rossiyada texnologiyalarni rivojlantirishning 2035-yilgacha bo‘lgan yo‘l xaritasi rejalashtirildi: unga, jumladan, dasturlashning mahalliy tili, Touch ID va fitnes-brasletlar muqobillari, uchuvchisiz uchar qurilmalar uchun aloqa operatorining yangi turi va teleportatsiya kirdi. Bu haqda TJournal xabar beradi.

Rossiya kvant markazi ilmiy xodimi Aleksey Fyodorov MTT dasturida kvant teleportatsiyasi haqida gap borayotganini aytdi. 1993-yilda e’lon qilingan ilmiy ishdan so‘ng paydo bo‘lgan termin moddaning o‘zini emas, uning kvant holatini masofaga uzatishni bildiradi, ya’ni bunda STA 2013-yilgacha dunyoning bir nuqtasidan ikkinchi nuqtasiga “portal”lar orqali ko‘chib yurishni rejalashtirgani haqida gap bormayapti.

“Kommersant” nashrining prezident ma’muriyatiga yaqin manbasi aniqlik kiritishicha, uzoq kelajakka mo‘ljallangan bunday loyihalarda har qanday narsa yozilishi mumkin, chunki ularni o‘sha yillarda kim amalga oshirishi noma’lum va buning uchun javobgarlik yo‘q.