MDH mamlakatlari sog‘liqni saqlash kengashi Qozog‘iston poytaxti Ostonadagi yig‘ilishda aholi salomatligiga tamakining salbiy ta’sirining oldini olishga qaratilgan qo‘shma harakatlar rejasi loyihasini tasdiqladi. Bu haqda “Gazeta.uz” xabar bermoqda.
Rossiya sog‘liqni saqlash vazirligi jamoat salomatligi va kommunikatsiyalar departamenti direktori Oleg Salagayga ko‘ra, reja aholini tamaki chekish asoratlaridan asrash bo‘yicha namunaviy qonun va bu yo‘nalishdagi davlat siyosatini tamaki sanoati aralashuvidan himoya qilish choralarini ishlab chiqishdan iborat.
Shuningdek, rejada tamaki tutunisiz muhitni yaratish, tamaki reklamasi va homiyligini man etish, tamaki mahsulotlarini zararlilik darajasiga qarab tasniflashni taqiqlash bo‘yicha tavsiyalar ishlab chiqish ko‘zda tutilgan. MDH ijroiya qo‘mitasi tuzilmaga a’zo davlatlar hukumatlari rahbarlarining navbatdagi yig‘ilishida mazkur rejani tasdiqlash uchun kerakli hujjatlarni tayyorlashi lozim.
Eslatib o‘tamiz, oldinroq O‘zbekiston hukumatining 10-iyundagi qarori bilan alkogol va tamaki sotuvchilari xaridorlar yoshini aniqlashtirishi talab etilishi haqida xabar berilgandi.
Izoh (0)