AQSh davlat kotibi Jon Kerri amerikaliklarni Orlandodagi terakt uchun javobgarlikni islom dini tarafdorlari bo‘yniga qo‘yishga urinmaslik haqida ogohlantirdi, deb yozadi “TASS”.
“Hozir qilishimiz mumkin bo‘lgan eng yomon narsa — u yoki bu guruh kishilari yoxud u yoki bu din vakillariga qaratilgan ayblovlar bilan chiqish”, — dedi Amerika diplomatiyasi rahbari kiprlik hamkasbi Ioannis Kasulidis bilan uchrashuv oldidan o‘tkazilgan matbuot anjumanida. “Bunday xatti-harakat mamlakatimiz qadriyatlariga to‘g‘ri kelmaydi”, — deya qo‘shimcha qildi Kerri.
Avvalroq AQSh prezidenti Barak Obama Orlandodagi tungi klub tashrifchilariga qurolli hujumni terakt deb atagan edi. Shuningdek, u Orlandodagi fojia “Amerika tarixida eng katta qirg‘in keltirgan otishma” bo‘lganini ta’kidladi.
Orlandodagi “Florida pals” tungi klubiga hujum natijasida 49 kishi o‘ldirildi, 53 kishi yaralandi. Teraktni kelib chiqishi afg‘onistonlik bo‘lgan amerikalik Umar Matin amalga oshirdi, u, OAVlar versiyalariga ko‘ra, IShID ekstremistik guruhi tarafdori bo‘lgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)