“Elektron hukumat” markazida Osiyo taraqqiyot banki missiyasi vakillari bilan uchrashuv bo‘lib o‘tdi

“Elektron hukumat” markazida Megan Kaunxen boshchiligidagi Osiyo taraqqiyot banki missiyasi vakillari bilan uchrashuv bo‘lib o‘tdi. Bank missiyasi O‘zbekistonga sog‘liqni saqlash sohasini rivojlantirishga qaratilgan loyihani tayyorlashga ko‘mak berish maqsadida keldi. Bu haqda “Elektron hukumat” markazi matbuot xizmatiga tayanib, “Infocom.uz” xabar bermoqda.

Uchrashuv davomida tomonlar loyihaning asosiy vazifa va yo‘nalishlari, uni tatbiq etishdan kutilayotgan natijalar, elektron sog‘liqni saqlash tizimi istiqbollarini muhokama qildi.

Bank missiyasi sog‘liqni saqlash sohasidagi loyihalarni amalga oshirish borasida tegishli vazirlik va tashkilotlar bilan maslahatlashuvlar olib borishni ham rejalashtirgan.