Hillari Klinton AQSh davlat kotibi lavozimini egallab turgan vaqtda (2009—2013-yillar) uning shaxsiy pochta qutisiga yordamchilari tomonidan yuborilgan xatlarning barchasini tekshirib, chop qilish uchun, AQSh davlat departamentiga 75 yil kerak bo‘ladi, deb yozadi “TASS”.
Bu haqda muassasa advokatlarining Kolumbiya federal okrugi sudiga jo‘natilgan arizasida aytiladi.
“Davlat departamentining hozirgi bandligini va ushbu hujjatlar tahlili bilan bog‘liq murakkabliklarni hisobga olgan holda, biz oyiga 500 ta sahifani ko‘rib chiqa olamiz. Shu tariqa, Sheril Millz (Klinton yordamchilarining shaxsiy apparati rahbari)ning xatlarini 16,6 yil, Jeykob Sallivan (Davlat departamenti siyosiy rejalashtirish bo‘limi rahbari)nikini — 33,3 yil, Patrik Kennedi (davlat kotibining menejment masalasi bo‘yicha o‘rinbosari)nikini — 25 yil davomida to‘liq ko‘rib chiqamiz. Bularning barchasiga jami 75 yil ketadi”, — deyiladi hujjatlarda.
Sudda Davlat departamentiga vakillik qilayotgan advokatlar so‘zlariga ko‘ra, Hillari Klintonning uch yordamchisi xatlarining umumiy hajmi 450 ming sahifani tashkil etadi.
Izoh (0)