Iordaniyada Al-Bakaa qochoqlar lagerida terakt yuz berdi. Oqibatda maxsus xizmatlarning besh nafar xodimi qurbon bo‘ldi. Bu haqda, Petra rasmiy agentligi ma’lumotiga tayanib, “RIA Novosti” xabar bermoqda.
Terakt uyushtirishda lager hududidagi maxsus xizmatlar ofisi nishonga olingan.
Lager mamlakat poytaxti Amman shahri yaqinida joylashgan.
Iordaniya hukumati vakilining ma’lum qilishicha, hujum musulmonlar uchun muqaddas Ramazon oyining birinchi kunida sodir etilganligi terrorchilarning dindan voz kechganligidan dalolat beradi.
Uning so‘zlariga qaraganda, hodisa yuzasidan surishtiruv boshlangan, uning tafsilotlari keyinroq ma’lum qilinadi.
Ma’lumot uchun, terakt uyushtirilgan lager 1968-yilda falastinliklarni joylashtirish uchun tashkil etilgan.