AQShning Milliy jamoatchilik radiosi (NPR) jurnalisti Devid Gilki va uning tarjimoni Zabihulla Tamanna Afg‘onistonda o‘ldirildi, deya xabar bermoqda “TASS” radiostansiya matbuot xizmatiga tayanib.
“Urush dardi va go‘zalligini qayd etgan NPR jurnalisti Devid Gilki Afg‘onistonda 5-iyun, yakshanba kuni mahalliy tarjimon Zabihulla Tamanna bilan o‘ldirildi”, — deyiladi bayonotda.
Aniqlik kiritilishicha, radiostansiya xodimlari Afg‘oniston armiyasi bo‘linmasi bilan birga harakatlanayotgan vaqtida o‘q yomg‘iri ostida qolgan.
Gilki va Tamanna bilan birga NPR’ning yana ikki jurnalisti bo‘lgan, ularga zarar yetmagan.
Gilki Afg‘oniston va Iroq, shuningdek, G‘azo sektoridagi jangovar harakatlarni yoritgan, Janubiy Afrika, Somali va Liberiyada ham ishlagan.