31-may kuni avstriyalik fokuschilar Tommi Ten va Ameli van Tass America’s got talent shousida qatnashib, “g‘oyibdan xabar ola bilish” iste’dodini namoyon etdi hamda hakamlar va tomoshabinlarni hayratda qoldirdi, deb yozadi TJournal.
Ten va Van Tassning eng mashhur tomoshasi ushbu juftlik oldindan ko‘ra bilish qobiliyatiga ega ekanligi illyuziyasiga asoslangan. Odatda qizning ko‘zini bog‘lashadi, shundan so‘ng uning sherigi tomoshabinlar oldiga tushib, ulardan turli buyumlarni ola boshlaydi, Ameli esa ularni batafsil tasvirlab beradi va, hatto, ulardagi mayda yozuvlarni, jumladan mahsulot muddati yoki seriya raqamini ham “o‘qib beradi”.
Van Tass va Ten ushbu tomoshani butun dunyo bo‘ylab bir necha marta turli sharoitlarda — sahnada, radiostansiyalarda va televideniyeda takrorlagan. Ularning “ijodi” bilan to‘qnash kelganlardan hech biri oldindan kelishuv bo‘lgani haqida aytmagan.
Qizning o‘zi esa Tommi qo‘liga olgan buyumlarni “ko‘rishi”ni, ularning harorati, shakli, rangi va boshqa xususiyatlarini his qilishini ta’kidlaydi. Agar aloqa yetarlicha kuchli bo‘lsa, ularga tushirilgan matnlarni ham o‘qiy boshlashi mumkin.
Izoh (0)