AQSh quruqlikdagi qo‘shinlar maxsus vazifalar bajaruvchi otryadining 11 nafar harbiy xizmatchisi 3-iyun, juma kuni Koloradodagi Roki-Mauntin tog‘ tizmasi cho‘qqisiga ko‘tarilish chog‘ida evakuatsiya qilindi. Bu haqda “TASS” xabar bermoqda.
Maxsus otryad 4,3 kilometr balandlikdagi Longs-Pik cho‘qqisiga mashq ko‘tarilishini amalga oshirayotgandi. Roki-Mauntin milliy bog‘i xodimlari 31-may, seshanba kuni harbiy xizmatchilar balandlik kasalligi tufayli o‘zini noxush his etayotgani va ularga yordam talab etilishi mumkinligi haqida xabar oldi. Shunday bo‘lsa-da, otryad komandiri cho‘qqiga ko‘tarilishni davom ettirishga qaror qildi.
Otryadni qutqarish uchun 43 nafar o‘rmonchi safarbar etildi. Vertolyot ekipaji tog‘dan barcha harbiylarni olib tushishi uchun yetti bor ko‘tarilishiga to‘g‘ri keldi.