Qirg‘iziston harbiy sudi birinchi instansiyaning mamlakat sobiq prezidenti Qurmanbek Bakiyevni va uning ukasi Jonibek Bakiyevni umrbod qamoq jazosiga mahkum qilish to‘g‘risidagi qarorini o‘z kuchida qoldirdi. Ular 2010-yilning 7-aprelida qurolsiz xalqni yoppasiga qirg‘in qilishda aybdor deb topilgan edi, deb eslatmoqda “Interfaks”.
Respublika harbiy sudiga raislik qiluvchi sudya Nurlan Ashimbekov ikkala Bakiyev qotillikda, mansabini suiiste’mol qilishda aybdor deb topilganini, ular umrbod qamoq jazosiga mol-mulkini musodara qilish bilan hukm etilganini yana bir bor e’lon qildi.
Bakiyev, shuningdek, 2002-yilning 17-martida, Qirg‘iziston bosh vaziri lavozimini egallab turganida mamlakatda favqulodda vaziyat joriy etganlikda hamda 2006-yilda muxolif siyosatchi Omurbek Tekebayevga qarshi noqonuniy ish ochganlikda aybdor deb topildi.
Bakiyevlardan tashqari, ularning sheriklari, sobiq davlat mansabdorlari Doniyor Dunganov va Nurlan Temirboyevlar 25 yilga ozodlikdan mahrum qilish jazosiga hukm qilindi. Yana bir qator javobgarlar turli muddatli qamoq jazosiga mahkum etildi.
Qarorlar sirtdan qabul qilindi — Bakiyevlar ayni paytda chet o‘lkada qochqinlikda bo‘lib, hukmni ijro etish imkoniyati yo‘q.
Izoh (0)