FIFA: Kengashning yig‘ilishi bayonnomasi yo‘q qilinmadi, Infantinoga qo‘yilayotgan ayblovlar asossiz

FIFA Kengashi yig‘ilishining bayonnomasi tashkilot prezidenti Janni Infantino ko‘rsatmasiga binoan yo‘q qilingani haqidagi gap-so‘zlar haqiqatga mos kelmaydi, aslida yozuv FIFA arxivida saqlab qo‘yilgan edi. Bu haqda FIFAning kommunikatsiyalar bo‘yicha departamenti direktori Deliya Fisher bayonot berdi, deb yozmoqda “TASS”.

Ilgariroq Welt am Sontag nashri tashkilot Kengashi majlisining yozuvlari yo‘q qilinganini aytgan edi. Nashr, shuningdek, bu ishni amalga oshirishga ko‘rsatma bergan Infantino yaqinda vazifasidan 90 kunga chetlashtirilishi mumkinligini bildirgandi.

“Nashr keltirgan elektron yozishmalarda audiofayl o‘chirilgani tilga olinadi, vaholanki gap uning lokal diskda noto‘g‘ri saqlangan nusxasini o‘chirish haqida ketgan edi. Bu rasmiy arxivlangan audiofaylga aloqador emas — u mavjud bo‘lib, FIFAda tegishlicha saqlab qo‘yilgan”, — deb ta’kidladi Fisher xonim.

Infantino 2016-yil fevralida FIFA prezidentligiga saylandi. U ko‘plab korrupsion janjallardan so‘ng mansabni tark etgan Yozef Blatterning o‘rnini egalladi.