Germaniya parlamenti armanilar genotsidi haqida rezolyutsiya qabul qildi

Bundestag deputatlari 1915-yilda Usmonli saltanatida armanilarning deportatsiya qilinishini genotsid deb tan olish yuzasidan rezolyutsiya qabul qildi. Rezolyutsiyaga qarshi faqat bir deputat ovoz berdi, bir nafari ovoz berishdan tiyildi, deb xabar beradi Meduza.

“1915–1916-yillarda Usmonli saltanatida armanilar va boshqa xristian ozchiliklarning genotsidi xotirasiga” deb atalgan hujjat kansler Angela Merkel va tashqi ishlar vaziri Frank-Valter Shtaynmayer yo‘qligida qabul qilindi.

Ma’lumot uchun, 1915-yilda Usmonli saltanatida, turli baholarga ko‘ra, 600 mingdan 1,5 milliongacha armani halok bo‘lgan. Turkiya yuz minglab insonlar halok bo‘lganini tan oladi, ammo buning “genotsid” atamasi bilan ta’riflanishiga qarshi chiqadi. O‘z navbatida, turk tarixchilari armanilarning qurolli guruhlari o‘n minglab musulmonlarni qirg‘in qilganini ta’kidlab keladi.