Oxirgi besh so‘rov yakunlariga ko‘ra Klinton Trampdan 2 foizga oldinda bormoqda

AQSh prezidentligiga nomzodlar — Hillari Klinton va Donald Tramp jamoatchilik so‘rovlarida ko‘rsatayotgan natijalari bo‘yicha deyarli teng bormoqda. CNN telekanalining 1-iyun kuni xabar qilishicha, oxirgi ikki hafta davomida o‘tkazilgan besh umummilliy so‘rov natijalari yakunlariga ko‘ra Klinton xonimni saylovchilarning 45 foizi, Trampni esa 43 foizi qo‘llab-quvvatlamoqda, deb xabar beradi “TASS”.

Mart va aprel oylaridagi so‘rovlarda Hillari Klinton Donald Trampdan ancha oldinda borayotgan edi — farq 10–14 foizni tashkil etayotgandi. Ammo hozirda tafovut bor-yo‘g‘i 2 foizni tashkil etmoqda. Bundan tashqari, ilgari respublikachilarning 12 foizi demokratlar vakilasi — Klinton xonimni qo‘llab-quvvatlagan bo‘lsa, endilikda ularning soni 6 foizgacha qisqardi. Bu respublikachilar o‘z nomzodlari bo‘lmish Tramp atrofida jipslashayotganidan dalolat beradi.