Urganchda “Kitob olami” do‘koni ochildi

31-may kuni Xorazm viloyatida, Urganch shahrida “Kitob olami” tarmog‘ining navbatdagi do‘koni ochildi. Bu haqda “Gazeta.uz” xabar bermoqda.

O‘zbekiston matbuot va axborot agentligi matbuot xizmatining ma’lum qilishicha, ochilish marosimida viloyat hokimi Po‘lat Bobojonov va agentlik bosh direktori Omonulla Yunusov ishtirok etdi.

550 kvadrat metr maydonga ega do‘konda 2 ming nom ostidagi 25 ming kitob taqdim etilgan. Tarmoqning boshqa do‘konlarida bo‘lganidek, bu yerda ham bolalar burchagi va kafe mavjud.

Xorazmdagi “Kitob olami”ning narxlari Toshkentdagi do‘kon narxlaridan farq qilmaydi.

Birinchi “Kitob olami” o‘tgan yilning noyabr oyida Toshkentda ochilgan edi. Aprel oyining oxiridan buyon tarmoq do‘konlari Nukusda, Namanganda, Farg‘onada va Andijonda ochildi. Endigi navbatda Buxoro turgani aytilmoqda.