AQSh prezidenti Barak Obama Xotira kuni munosabati bilan Vashingtonda joylashgan Arlington milliy qabristonidagi Noma’lum askar qabriga gulchambar qo‘ydi. Arlingtonda 300 ming amerikalik harbiy xizmatchi dafn etilgan, deb eslatadi “TASS”.

Marosim davomida harbiy orkestr davlat madhiyasini ijro etdi. So‘ng davlat rahbari bir yerda to‘plangan faxriylar, sobiq harbiy xizmatchilar va ularning oila a’zolari qarshisida chiqish qildi.

“Bu yerda dafn etilgan amerikaliklar va ularning oila a’zolari bizlarning eng asllarimizdir. Bir vaqtlar biz uchun borini berganlar bugun evaziga bir narsa so‘ramoqda — ularni esdan chiqarmasligimizni”, — dedi Obama o‘z chiqishida.

Prezident urushlar qurbonlariga bo‘lgan hurmatni tirik qolganlarga davlat tomonidan ko‘rsatilayotgan e’tibordan bilish mumkinligini ta’kidladi.

“Biz ular o‘zlari munosib bo‘lgan narsani olishlariga kafolat berishimiz lozim, xoh sog‘liqni saqlash bo‘lsin, xoh munosib ish o‘rinlari”, — qo‘shimcha qildi u.