Yevro—2016 musobaqasiga tayyorgarlik ko‘rayotgan Ispaniya milliy terma jamoasi 29-may kuni Bosniya va Gersegovina termasi bilan o‘rtoqlik o‘yinida maydonga tushdi va 3:1 hisobida zafar quchdi.
Uchrashuvning 45-daqiqasida kichik janjal kelib chiqdi va u mehmonlarning yoshi eng katta futbolchisi Emir Spaxichning maydondan chetlatilishi bilan yakuniga yetdi. Jamoadoshi Vranyeshni himoya qilish uchun yetib kelgan Spaxich “Chelsi” safida to‘p suradigan ispaniyalik ikki futbolchiga tarsaki tushirishga qaror qildi. Avvaliga Sesar Aspilikueta Spaxichning kafti bilan yuzlashgan bo‘lsa, keyinroq Sesk Fabregas shunday holatda qoldi.
Spaxich bunga qadar bitta gol urishga muvaffaq bo‘lgandi. Ikkinchi taym oldidan esa Bosniya va Gersegovinaning maydonda bir kishi kam bo‘lib qolishiga sababchi bo‘ldi.
Germaniyaning “Gamburg” klubi sharafini himoya qiladigan Emir Spaxich 2015/16-yilgi mavsum yakuniga ko‘ra jamoasining eng ko‘p marta ogohlantirilgan futbolchisi bo‘ldi. 26 uchrashuvda Bundesliga hakamlari uni 7 marta ogohlantirdi va 1 marta maydondan chetlatdi.
Qayd etish kerak, Ispaniya terma jamoasi Yevro—2016 “D” guruhida Xorvatiya, Chexiya va Turkiyaga qarshi kurash olib boradi. Bosniya va Gersegovina terma jamoasi esa pley-offda Irlandiyadan yengilib, Yevropa Chempionatini qo‘yib yuboradigan bo‘lgandi.
Xalqaro o‘rtoqlik uchrashuvi 29-may, yakshanba
Ispaniya — Bosniya va Gersegovina 3:1
Gollar: Nolito, 11 (1:0). Nolito, 18 (2:0). Emir Spaxich, 29 (2:1). Pedro, 90 (3:1).Chetlatish: Emir Spaxich, 45+1 (B).
Izoh (0)