Qutqaruvchilar Everest cho‘qqisi yonbag‘rida g‘oyib bo‘lgan to‘rt nafar hind alpinistlaridan oxirgisining tanasini topdi. Bu haqda, Himalayan Times nashriga asoslanib, “RIA Novosti” xabar bermoqda.
Halok bo‘lgan alpinist dunyodagi eng baland cho‘qqini zabt etishga otlangan to‘rt kishilik guruh tarkibida edi. 21-may, shanba kuni guruhning barcha a’zolari bedarak yo‘qoldi. Ertasi kuni ikki kishi topildi, lekin qutqaruvchilar ularni evakuatsiya qilayotgan chog‘da guruh a’zosi Subxash Pal olamdan o‘tdi.
27-may kuni guruhning uchinchi a’zosi — 58 yoshli Paresh Chandra Natxning tanasi sakkiz ming metr balandlikdan topildi. Oxirgi alpinist — Goutam Gxoshning taqdiri noma’lum bo‘lib qolayotgandi. Ekspeditsiyaning omon qolgan a’zosi — Lakpa Sherpa o‘sha kuniyoq uning jasadi topilganini ma’lum qildi.
Ekspeditsiya tashkilotchisi, “Nepal” alpinistlar lageri boshqaruvchi direktori Vanchu Sherpa Gxosh va Pareshning tanalari toqqa xavfsiz chiqish mavsumi yakunlangani bois joriy yilda evakuatsiya qilinmasligini aytib o‘tdi.
“Qutqaruvchilar yomon ob-havo tufayli hind alpinistlari Goutam Gxosh va Paresh Natxning tanalarini qaytarish harakatlarini to‘xtatdi. Biz ularni keyingi mavsumda evakuatsiya qilishdan umidvormiz”, — tan oldi u.
Goutam Gxosh oxirgi o‘n kunda Everestda halok bo‘lgan beshinchi alpinist bo‘ldi. Yigirmanchi may kuni 35 yoshli Niderlandiya fuqarosi Erik Arnold, ertasi kuni esa avstraliyalik ayol Mariya Stridom halok bo‘lgandi.
Izoh (0)