“Real” Yevropa Chempionlar Ligasida 11-bor g‘oliblikni qo‘lga kiritdi

Yevropa Chempionlar Ligasi finalida “Atletiko”ni penaltilar seriyasiga ko‘ra mag‘lub etgan Madridning “Real” klubi 11-bor bosh sovringa ega chiqdi. Bu rekord ko‘rsatkich, deb yozdi UEFA rasmiy saytining Twitter’dagi sahifasi.

• “Real Madrid” — “Atletiko Madrid” 1:1. Penaltilar seriyasi — 5:3. Matnli onlayn

Uchrashuvning asosiy vaqtida g‘olib jamoani aniqlashning imkoni bo‘lmadi. 15-daqiqada Serxio Ramos hisobni ochgan bo‘lsa, 79-daqiqada zaxiradan maydonga tushgan Ferreyra-Karrasko muvozanatni tikladi. Qayd etish kerak, Chempionlar Ligasining 2013/14-yilgi mavsumi finalida ham Madrid klublari asosiy vaqtda masalani hal qila olmagandi.

• So‘rovnoma: Yevropa Chempionlar Ligasi finalida kim g‘alaba qozonadi — “Real”mi “Atletiko”?

Qo‘shimcha sifatida o‘yinning 48-daqiqasida “Atletiko” futbolchisi Antuan Grizmann penaltidan aniq foydalana olmaganini e’tirof etish lozim. Uning zarbasidan keyin to‘p darvoza to‘siniga tegib qaytdi. So‘nggi bor Chempionlar Ligasining 2012-yilgi finalida gollandiyalik futbolchi Aryen Robben 11 metrlik jarima zarbasini gol bilan yakunlay olmagandi.

“Real” himoyachisi Serxio Ramos esa Chempionlar Ligasining finalida 2 ta gol ura olgan birinchi himoyachi sifatida tarixga kirdi. Uning birinchi goli ham aynan “Atletiko” darvozasiga kiritilgan bo‘lib, ikki yil muqaddam Ispaniya terma jamoasi a’zosi 93-daqiqada “Real”ni mag‘lubiyatdan qutqarib qolgandi.

O‘yinning qo‘shimcha daqiqalarida hisob o‘zgarmadi va g‘olib penaltilar seriyasiga ko‘ra aniqlanadigan bo‘ldi. Dastlabki uchtadan zarbada hech bir futbolchi xatoga yo‘l qo‘ymagan bo‘lsa, “Atletiko” safida Xuanfran tomonidan berilgan zarbadan keyin to‘p darvoza ustuniga tegib qaytdi. Ronalduning hal qiluvchi zarbasi esa “Real”ga chempionlik kubogini taqdim etdi.

Ma’lumot uchun, “Atletiko” o‘z tarixida uch bor Chempionlar Ligasining finalida ishtirok etgan va ularning barchasida yengilgan klub bo‘lib qoldi.

Yevropa Chempionlar Ligasi FINAL 28-may, shanba

“Real” (Ispaniya) — “Atletiko” (Ispaniya) 1:1 pen: 5:3

Gollar: Serxio Ramos, 15 (1:0). Yannik Ferreyra-Karrasko, 79 (1:1).Noaniq penalti: Antuan Grizmann, 48 (A).“Real”: Keylor Navas, Pepe, Serxio Ramos, Marselo, Danyiel Karvaxal (Danilo, 52), Kazemiro, Toni Kroos (Isko, 72), Luka Modrich, Garet Beyl, Karim Benzema (Lukas Vaskes, 77), Krishtianu Ronaldu.“Atletiko”: Yan Oblak, Diyego Godin, Xuanfran, Stefan Savich, Filipe Luis (Lukas Fernandes, 109), Gabi, Augusto Fernandes (Yannik Ferreyra-Karrasko, 46), Koke (Tomas, 116), Saul, Fernando Torres, Antuan Grizmann.