AQSh Kongressida 2017-yil mamlakat harbiy budjetiga portlariga Rossiya harbiy kemalari kirishiga ruxsat beradigan NATO mamlakatlari haqida Pentagondan hisobot olish talab qilinadigan tuzatish kiritildi. Bunga Ispaniyaning Seuta porti turtki bo‘lgani bildirilmoqda, deya xabar beradi “RBK”.
Harbiy budjetga tuzatish kiritishni Pensilvaniya shtatidan kongressmen, respublikachi Jo Pitts taklif etdi. Uning aytishicha, “Ispaniya Rossiya kemalariga Seuta portiga kirishiga ruxsat berishi NATO davlatlari birdamligiga raxna soladi. Alyans umumiy pozitsiyaga ega bo‘lishi va Rossiya harbiy kemalarini o‘z portlariga qo‘ymasligi zarur”.
AQSh Kongressida Ispaniyaga nisbatan tanqid mamlakatning Shimoliy Afrika sohillaridagi Seuta portiga may oyida Rossiyaning “Ladniy” qo‘riqchi kemasi kirganidan so‘ng (ekspertlar hisobiga ko‘ra, 2011-yildan beri bu yerda Rossiyaning 57 harbiy kemasi to‘xtagan) yangradi. Biroq Madrid Rossiya harbiy-dengiz floti kemalarini qabul qilish mamlakatga nisbatan joriy etilgan sanksiyalar tartibini buzmasligini ma’lum qildi. Undan tashqari, rossiyalik harbiylar Ispaniyaning qashshoq mintaqalaridan bo‘lgan Seuta budjetiga qo‘shimcha daromad keltirmoqda. El Pais ma’lumotlariga ko‘ra, 2014-yilning o‘zida shaharga 2300 nafar rus dengizchisi kelgan va har biri o‘rtacha 450 yevro sarflagan.
Izoh (0)