Portugaliyalik futbol mutaxassisi Joze Mourinyo “Manchester Yunayted” jamoasiga rasman bosh murabbiy etib tayinlandi. Bu haqda mankunianlarning rasmiy sayti xabar bermoqda.
53 yoshli murabbiyning “MYu” bilan shartnomasi 3 yilga mo‘ljallangan bo‘lib, tomonlar uni 2020-yilgacha uzaytirish imkoniyatiga ega.
23-may, dushanba kuni “MYu” rahbariyati gollandiyalik mutaxassis Lui van Galni bosh murabbiy lavozimidan ozod etgandi. Portugaliyalik mutaxassisning so‘nggi ish joyi Londonning “Chelsi” klubi bo‘lgan. U qoniqarsiz natijalari uchun 2015-yilning dekabr oyida “Chelsi” bosh murabbiyligidan iste’foga chiqarilgan edi.
Eslatib o‘tamiz, “Manchester Yunayted” 2015/16-yilgi mavsum yakuniga ko‘ra Angliya chempionatida 5-o‘rinni egalladi va kelasi mavsumda YeChL turnirida ishtirok etish huquqini qo‘lga kirita olmadi. Shuningdek, jamoa Angliya Kubogi sohibi bo‘ldi.
Izoh (0)