Dubayda 3D-printer yordamida yaratilgan dunyodagi birinchi ofis binosi ochildi, deya xabar bermoqda “RBK” Birlashgan Arab Amirliklari hukumati saytiga tayanib.
Bino shahar markazida, Dubay xalqaro moliya markazi yaqinida joylashgan. U “Kelajak ofisi” (Office of the Future) deb nomlandi. Unda loyihaga tashabbuskorlik qilgan Dubay kelajak fondi tashkilotining vaqtinchalik bosh qarorgohi joylashadi.
Bir qavatli binoning maydoni qariyb 250 kvadrat metrni tashkil etadi. Konstruksiyaning mustahkamligini ta’minlash maqsadida uning tomini yumaloq shaklda yasashdi. Bino odamlar ishlashi uchun to‘liq yaroqli: unga elektr toki, telekommunikatsiyalar, suv ta’minoti o‘tkazilgan va havoni konditsiyalash tizimi o‘rnatilgan.
Inshootni qurish uchun balandligi 6 metr, uzunligi 37 metr va eni 12 metrli 3D-printerdan foydalanildi. Qurilishda maxsus sement aralashmasi hamda BAA va AQShda ishlab chiqarilgan materiallar ishlatildi. Qurilish materiallarining ishonchliligi Xitoy va Buyuk Britaniyada sinab ko‘rildi.
Qurilish taxminan 140 ming dollarga tushdi. Uni barpo etishda 19 kishidan iborat jamoa ishtirok etdi. Ta’kidlanishicha, loyihani amalga oshirishda mehnat haqiga xuddi shunday kattalikdagi oddiy binoni qurishda ketadigan xarajatning yarmi sarflangan.
Izoh (0)