Apple ultratovush texnologiyalari va simsiz quvvatlantirish sohasidagi ikki mutaxassisni yolladi. Kompaniya akkumulyatorni ultratovush quvvatlantirish texnologiyasi ustida ishlamoqda va gadjetlarni masofadan turib to‘yintiradigan qurilmalarni yaqin kelajakda namoyish etishi ehtimoldan xoli emas. Bu haqda “Hi-Tech Mail.ru” xabar bermoqda.
Jonatan Bolus va Endryu Joys 2016-yil yanvarida Apple’ga kelgunga qadar qurilmalarni ultratovush yordamida quvvatlantirish texnologiyasini ishlab chiqqan uBeam kompaniyasida ishlagan. Mazkur texnologiya elektr tarmog‘iga ulangan manba va smartfon yoki boshqa gadjetga mahkamlanadigan qabul qilgich bo‘lishini taqozo etadi. Ultratovush, boshqa simsiz quvvatlantirish qurilmalaridan farqli ravishda, manba va qabul qilgich bir-biridan ancha olisda bo‘lishiga imkon beradi. Hozirda Bolus va Joys ushbu masofani uzaytirish ustida ishlayotgani taxmin qilinmoqda.
Ekspertlar Apple bir necha yildan so‘ng rozetkagacha bo‘lgan masofaga bog‘liq bo‘lmagan chindan ham simsiz quvvatlantirish qurilmasini taqdim etishini istisno etmagan.
Izoh (0)