Yaman hukumati Adanda yengil narkotikni ish kunlari iste’mol qilishni taqiqladi

Yaman hukumati mamlakatning janubiy poytaxti Adanda tarkibida kuchsiz narkotik modda bo‘lgan kat yaproqlarini iste’mol qilishni taqiqlab qo‘ydi, deya xabar bermoqda “TASS”.

Ichki ishlar vazirligining Adan bo‘yicha boshqarmasining maxsus buyrug‘ida “shaharga kat yaproqlarini olib kirish, ularni tarqatish va iste’mol qilish payshanba kuni kechki payt va juma kunidan tashqari, haftaning barcha kunlarida taqiqlanishi” aytiladi. Juma — mamlakatda dam olish kuni hisoblanadi.

Bunday buyruq kat iste’moli tufayli “shaharda transport harakati va xavfsizlik xizmati vakillari faoliyati”ga yetadigan zararning oldini olish maqsadida qabul qilingan.

Kat yaproqlarini iste’mol qilish (chaynash) — Yamanning 25 millionlik aholisining uchdan bir qismi uchun an’anaviy mashg‘ulotdir. Din tomonidan taqiqlanmagan vosita uchrashuvlar, tantanalar yoki do‘stona ziyofatlar chog‘ida aholi tomonidan foydalaniladi. Yamanliklarning o‘zlari katni “al-makil” deb ataydi, bu arabchadan tarjima qilganda “dam olish jarayoni” demakdir.