Lavozimidan chetlatilgan Braziliya prezidenti Dilma Russeff unga nisbatan impichment yuzasidan yakuniy qaror chiqarilgunga qadar maosh olish va imtiyozlardan foydalanishda davom etadi. Bu haqda mamlakat parlamenti yuqori palatasi — senat raisi Renan Kaleyrus ma’lum qildi, deya xabar beradi “TASS”.
“Prezident lavozimidan vaqtincha chetlatilgani haqida ogohlantirish olganidan boshlab senat impichment haqidagi so‘rovni batafsil ko‘rib chiqa boshladi. Bu vaqt davomida Russeff qo‘riqchilar, tibbiy sug‘urta, avia va avtotransport, maosh, rasmiy qarorgohdan foydalanish huquqini saqlab qoladi. Devonidagi maslahatchilar ham u bilan ishlashda davom etadi”, — deya ta’kidlagan senat raisi.
12-may, payshanba kuni Braziliya senati Russeffga nisbatan impichment jarayoni davom ettirilishi uchun ovoz berdi (55 kishi yoqlagan, 22 kishi qarshi chiqqan) va bu prezident davlat rahbarligidan vaqtincha chetlatilishiga olib keldi. Russefning o‘zi buni “to‘ntarish” va “siyosiy o‘yin” sifatida baholadi.
Izoh (0)