Bir muddat avval klipmeyker Rauf Nabiyevning Instagram’dagi sahifasida eski bir kabrioletning surati paydo bo‘ldi. Suratga muallif shunday izoh qoldirgan: “‘Maftuningman’ filmidagi tarixiy mashina — ‘M’-ka”.
“Darakchi” gazetasining yozishicha, “‘Maftuningman’ filmi bosh qahramonlarining baxtli kunida xizmat qilgan mashina” hozirda O‘zbekistonda xizmat ko‘rsatgan artist, aktyor Jumadulla Rametovga tegishli.
“Tarixiy buyumlarga qiziqqanim bois, ‘Maftuningman’ filmida ishlatilgan mashina e’tiborimni tortgan. Shu mashinani ‘O‘zbekfilm’ kinostudiyasidan uch yil avval sotib olganman. Shundan beri uni haydab yuraman”, — deydi aktyor.
Qayd etish joiz, “Maftuningman” filmi bosh qahramonlarini film so‘ngida aeroportga olib borib qo‘yadigan avtomobil afsonaviy ZIS-110 avtomobilining kabriolet versiyasi hisoblanadi.
Rauf Nabiyevning Instagram’ida surati e’lon qilingan hamda Jumadulla Rametovga tegishli avtomobil esa, katta ehtimol bilan, 1936—1943-yillarda ishlab chiqarilgan M-1 ning modernizatsiya va tyuning qilingan, kabrioletga aylantirilgan ko‘rinishidir.
Izoh (0)