Xitoyning Xunan provinsiyasida qo‘l-oyoqlarida 31 ta barmoq bilan tug‘ilgan Gonk Gonkning ota-onasi uch oyli chaqaloqdan tananing ortiqcha a’zolarini olib tashlash bo‘yicha qimmat jarrohlik amaliyoti uchun mablag‘ qidirmoqda. Bu haqda “Korrespondent.net” xabar berdi.
Bolakayning qo‘lida 15, oyog‘ida esa 16 ta barmoq bor. Uning ota-onasida ham polidaktiliya, ya’ni barmoqlar me’yordagidan ko‘pligi kuzatilgani bildirilmoqda. Jumladan, Gonk Gonkning onasi qo‘llarida oltitadan barmoq bo‘lib, hozirgacha shunday yashab keladi.
Barmoqlar hali yetarli darajada rivojlanmagani va o‘sishda davom etayotgani uchun bolani chaqaloqligida operatsiya qilishga to‘g‘ri keladi. Biroq bunday amaliyot narxi 500 ming yuangacha (77 ming dollar atrofida) borishi tufayli zavodda ishlaydigan ota-ona qo‘shimcha mablag‘ manbasini axtarish bilan ovora.