AQSh armiyasi kapitani IShIDga qarshi kurash tufayli Obamani sudga berdi

Amerikalik harbiy xizmatchi AQSh prezidenti Barak Obamaga nisbatan davlat rahbari tomonidan IShID terrorchilik guruhiga qarshi o‘tkazilayotgan harbiy kampaniyaning qonuniyligi yuzasidan sudga da’vo kiritdi. Bu haqda The New York Times xabar beradi.

“Men suddan harbiy vakolatlar haqidagi rezolyutsiyaga muvofiq Iroq va Suriyada IShIDga qarshi urush boshlash uchun davlat rahbari Kongressning tegishli roziligini olishi lozimligini prezidentga ma’lum qilishni so‘rayman”, — deyiladi AQSh armiyasining 28 yoshli kapitani Maykl Smitning arizasida.

Oq uy 2001-yil 11-sentabr teraktlariga aloqador terrorchilik guruhlariga qarshi kurashish haqida Kongress tomonidan 15 yil avval ma’qullangan hujjat Iroq va Suriyada operatsiya o‘tkazish uchun yetarli deb hisoblamoqda.

Nashrning ta’kidlashicha, hozirgi paytda Maykl Smit Kuvaytda bo‘lib, u da’vo kiritganligiga qaramasdan, Suriya va Iroqda IShID jangarilariga qarshi kurashish g‘oyasini to‘liq qo‘llab-quvvatlashini ma’lum qilgan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.