Turk armiyasi Kilis shahri o‘qqa tutilishiga javoban IShID marralariga zarba berishda davom etadi. Bu haqda mamlakat prezidenti Rajab Toyyib Erdo‘g‘on 4 may, chorshanba kuni mintaqa rahbariyati oldidagi chiqishi chog‘ida ma’lum qildi, deya xabar beradi “TASS”.
“Suriyadan bizning Kilis shahrimizga raketalar tushishi oqibatida ko‘pchilik, jumladan, Suriyadan kelgan mehmonlar nobud bo‘ldi. O‘qqa tutishlar davom etmoqda. Armiyamiz kelgusida ham mazkur hujumlarga javob qaytaradi. IShID Kilisga zarba berishni davom ettirsa, yanada ko‘proq yo‘qotishlarga duch keladi”, — deb ta’kidladi Erdo‘g‘on.
Joriy yil boshidan beri Kilisda Suriyaning IShID tomonidan nazorat qilinayotgan chegaraoldi hududlaridan yo‘llangan 50 dan ortiq raketa va minomyot snaryadlari portladi. Buning oqibatida 20 kishi halok bo‘ldi, 60 dan oshiq kishi jarohatlandi. Ular orasida Turkiyadan boshpana topgan suriyalik qochqinlar bor.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)