Afg‘oniston milliy armiyasi va politsiyasi bo‘linmalarining Qandahor viloyatidagi qo‘shma operatsiyasi davomida “Tolibon” harakati yetakchilaridan biri, uning o‘rinbosari hamda 43 nafar jangari o‘ldirildi. Bu haqda “Interfaks” xabar bermoqda.

“Qandahor viloyati, Shovali-Kot tumani, Katasang qishlog‘ida bo‘lib o‘tgan operatsiya davomida ‘Tolibon’ harakatining viloyatdagi norasmiy noibi, Hoji Lolo nomi bilan taniqli bo‘lgan Hayot, uning o‘rinbosari Ahmadshoh Himmat va ularga tobe 43 jangari yo‘q qilindi. Yetti soat davom etgan jang mobaynida kuch tuzilmalari xodimlaridan hech kim jabrlanmadi”, — deb ma’lum qilindi Afg‘oniston IIV tomonidan 2-may, dushanba kuni tarqatilgan xabarda.

Mamlakat shimoli-g‘arbidagi Juzjon viloyatida “Tolibon” harakatiga mansub uch guruh rasmiylar tomoniga o‘tdi. Viloyat hokimi Lutfullo Aziziyning aytishicha, yetakchilari qatorida dala qo‘mondonlaridan Iqbol ham bo‘lgan guruhlar 2-may, dushanba kuni hukumat bilan qarama-qarshilikni to‘xtatdi va tinchlik jarayoniga qo‘shilganini e’lon qildi.