Bag‘dodda xavfsizlik bilan bog‘liq vaziyat nazorat ostiga olindi. Bu haqda Iroq bosh vaziri Haydar Al-Obodiy o‘z Twitter’ida ma’lum qildi, deb yozadi “RBK”.
Avvalroq Iroq shialarining radikal yetakchisi tarafdorlari parlament binosiga bostirib kirgan, shundan so‘ng shaharda favqulodda holat rejimi joriy qilingan edi.
“Bosh vazir Al-Obodiy Bag‘doddagi xavfsizlik bilan bog‘liq vaziyat nazorat ostida ekanligini ta’kidlamoqda va namoyishchilarni norozilik harakatlari uchun maxsus ajratilgan joyga qaytishga chaqirmoqda”, — deyiladi xabarda.
30-aprel kuni Iroq bosh vaziri parlamentda vazirlar mahkamasining yangi tarkibini tasdiqlash uchun vakillik qilishi kerak edi. So‘nggi lahzada ovoz berish keyinga qoldirildi. Shundan so‘ng Iroq shialari radikal yetakchisi Muktada as-Sadr o‘z tarafdorlari qarshisida nutq so‘zlab, xalq xohish bildirsa, yangi hukumatni shakllantirish niyatini ma’lum qildi. U xalqni korrupsiyaga qarshi inqilob boshlashga chaqirdi.
Natijada uning yuzlab tarafdorlari Bag‘dodning davlat muassasalari joylashgan qo‘riqlanadigan “yashil hudud”iga kirib bordi. Shundan keyin shaharda favqulodda holat e’lon qilindi.
Izoh (0)