Amerikaning Luiziana shtatida 29-aprel, juma kuni qora tanli amerikalik erkak ozod etildi. U keyinchalik konstitutsiyaga zid deb topilgan hukm tufayli 41 yillik qamoq jazosini o‘tadi. Bu haqda, Reuters agentligi ma’lumotiga tayanib, “TASS” xabar beradi.
1974-yilda Geri Tayler 13 yoshli oq tanli Tomas Uyeberni o‘ldirganligi uchun o‘lim jazosiga mahkum etilgan edi. Qora tanli o‘smir do‘stlari bilan avtobusda maktab o‘quvchilari, jumladan, Uyeberning oldidan o‘tib ketayotganda, o‘quvchilarga qarata o‘q uzilgan. Avtobusda tintuv o‘tkazilganda, to‘pponcha topilgan. Politsiya faqat oq tanli bolalarning ko‘rsatmasiga tayanib, Taylerni hibsga olgan. Ishni ko‘rib chiqqan oq tanli sud hay’ati afroamerikalik o‘smirni bir ovozdan aybdor deb topgan.
1976-yilda Taylerga nisbatan tayinlangan o‘lim jazosi umrbod qamoq jazosi bilan almashtirilgan. O‘sha yili Luiziana va boshqa shtatlarda o‘lim jazosi bekor qilingandi. Keyinchalik guvohlar o‘z ko‘rsatmalarini qaytarib olganidan so‘ng rasmiylar uning jazo muddatini uch marta qisqartirdi.
AQShning beshinchi okrugi apellyatsiya sudi ishni qayta ko‘rib chiqib, 1974-yilda chiqarilgan hukmni konstitutsiyaga zid deb hisobladi. Sud 16 yoshli o‘smir voyaga yetgan shaxs sifatida sudlangan, bundan tashqari, unga aybsizlik prezumpsiyasidan foydalanish imkoniyati berilmagan deb topdi.
Luizianada voyaga yetmagan jinoyatchilar uchun umrbod qamoq jazosi bekor qilingandan keyingina adolat qaror topdi. Bu vaziyat takroriy sud majlisini o‘tkazish imkonini berdi va unda Tayler aybiga iqror bo‘lib, 21 yillik qamoq jazosiga hukm qilindi. U ikki marta ko‘proq muddat qamoqda o‘tirganligi uchun birdaniga ozod qilindi.