Qozog‘istonning Chimkent shahrida ITF turkumiga kiruvchi, sovrin jamg‘armasi 10 ming dollardan iborat Shymkent Open tennis turniri davom etmoqda, deb xabar beradi “Olamsport”.
Saralash bahslari orqali asosiy bosqichga chiqqan O‘zbekiston vakili Komola Umarova chorak finalda turnirning oltinchi raketkasi, belaruslik Svetlana Pirajenkadan 7:6, 2:6, 7:5 hisobida ustun kelib, yarim finalga chiqdi. Uning navbatdagi raqibi belaruslik Ilona Kremen bo‘ladi.
16 yoshli Umarova birinchi davrada rossiyalik Polina Novikovani 4:6, 6:2, 6:4 hisobida mag‘lubiyatga uchratdi. Ikkinchi davrada gruziyalik Sofia Kvatsabayaga qarshi bahs olib borgan o‘zbekistonlik tennischi dastlabki setni 6:4 hisobida o‘z foydasiga hal qildi. Ikkinchi setda 1:2 hisobida ortda borayotgan gruziyalik tennischi uchrashuvni davom ettira olmasligini ma’lum qilgandi.
Musobaqaning birinchi raketkasi sifatida qayd etilgan o‘zbekistonlik Sabina Sharipova esa kutilmaganda chorak final bahsida turnirning sakkizinchi raketkasi, rossiyalik Anna Kalinskayaga 2:6, 3:6 hisobida imkoniyatni boy berib qo‘ydi.
Eslatib o‘tamiz, Sharipova ilk davrada qozog‘istonlik Arina Taluenkoni 6:1, 6:1, ikkinchi esa davrada rossiyalik Yekaterina Kazionovani 6:1, 6:1 hisobida mag‘lubiyatga uchratgan edi.
Izoh (0)