O‘zbekiston Oliy va o‘rta maxsus ta’lim vazirligining O‘rta maxsus, kasb-hunar ta’limi markazi, Mehnat vazirligi va Xalq ta’limi vazirligining birgalikdagi qarori (pdf) bilan Yetim va ota-ona qaramog‘idan mahrum bo‘lgan, to‘liq davlat ta’minotida bo‘lmagan o‘rta-maxsus, kasb-hunar ta’limi muassasalari bitiruvchilarini “Mahalla” xayriya jamoat fondi tomonidan tanlab olish hamda ularga nafaqa to‘lash tartibi to‘g‘risidagi nizom tasdiqlandi.

Hujjatga ko‘ra, quyidagi toifadagi bitiruvchilar “Mahalla” xayriya jamoat fondi mablag‘lari hisobiga to‘lanadigan eng kam oylik ish haqining yigirma baravari miqdorida bir yo‘la nafaqa olish uchun murojaat qilish huquqiga ega:

• yetim bolalar — otasi ham, onasi ham vafot etgan yoki ular sud qaroriga binoan vafot etgan deb e’lon qilingan bolalar;
• ota-ona qaramog‘idan mahrum bo‘lgan bolalar — ota-onasi ota-onalik huquqidan mahrum etilgan, ularning ota-onalik huquqi cheklangan, muomalaga layoqatsiz deb topilgan, kasal bo‘lgan, uzoq muddat bo‘lmagan va boshqa sabablarga ko‘ra ota-ona qaramog‘idan mahrum bo‘lgan bolalar.

Bitiruvchi nafaqa olish uchun o‘rta maxsus, kasb-hunar ta’limi muassasasini bitirib, ishga joylashgandan keyin o‘zi tamomlagan o‘rta maxsus, kasb-hunar ta’limi muassasasi direktoriga nafaqa berilishini so‘rab ariza bilan murojaat qiladi. Arizaga qator hujjatlar ilova qilinadi.