Misrning sayyohlik sohasidagi daromadi 2016-yil birinchi choragida 500 million dollarni tashkil qildi, bu o‘tgan yilning shu davriga nisbatan 66 foizga kam demakdir. Bu haqda mamlakat sayyohlik vazirligi iqtisodiy maslahatchisi Adla Ragabaga tayanib, “Interfaks” xabar bermoqda.
2015-yil birinchi choragida sayyohlik tufayli mamlakat byudjetiga 1,5 milliard dollar kelib tushgan edi. Misrga tashrif buyurgan sayyohlar soni ham 2016-yil birinchi choragida 1,2 million nafargacha kamaydi, 2015-yilning shu davrida esa mamlakatga 2,2 million sayyoh kelgan edi.
Misr hukumati aprelda yarim yil ichida mamlakatga xorijdan keladigan sayyohlar oqimini qayta tiklash bo‘yicha yangi rejani taklif qilgan edi. U chet ellik sheriklar bilan hamkorlik, sayyohlik infratuzilmasini rivojlantirish, milliy tashuvchilarni qo‘llab-quvvatlash va turizm sohasiga investitsiyalar jalb qilishni o‘z ichiga oladi. Biroq xavfsizlik muammolariga yetarlicha e’tibor qaratilmayotgani tufayli, ekspertlar uning muvaffaqiyatiga shubha qilmoqda.
Eslatib o‘tamiz, 2015-yilning 31-oktabr kuni Rossiyaning “Kogalimavia” kompaniyasiga tegishli Airbus A321 samolyoti Sinayda quladi. Bortda bo‘lgan 217 yo‘lovchi va ekipajning yetti nafar a’zosi halok bo‘ldi. Rossiya hukumati fojiani terakt deb baholadi.
8-noyabr kuni Rossiya prezidenti Vladimir Putin farmon imzoladi, unga ko‘ra, Rossiya fuqarolarining Misrga havo orqali tashilishi to‘xtatildi. Sayyohlik operatorlari va agentliklariga taqiq amalda vaqtida ushbu mamlakatga yo‘llanmalar sotishdan tiyilish tavsiya etildi.
Izoh (0)