Saudiya Arabistoni hukumati mamlakatni rivojlantirish bo‘yicha 2030-yilga qadar mo‘ljallangan rejani qabul qildi

Saudiya Arabistoni Vazirlar mahkamasi “Qirollik nigohi 2030” nomi ostida mamlakatni rivojlantirish uzoq istiqbolli rejasini qabul qildi. Bu haqda qirol Salmon bin Abdulaziz as-Saud bayonot berdi.

“Biz iqtisodiy masalalar bo‘yicha kengashga 2030-yilga qadar mamlakatni rivojlantirish rejasini yo‘lladik. U butun dunyoga o‘rnak bo‘la oladi degan umiddamiz”, — uning so‘zlarini keltiradi “TASS”.

Tashabbusdan ko‘zlangan maqsad — iqtisodiyot diversifikatsiyasi, daromad strukturasida neft eksportining ulushini qisqartirish. Bu rejadan o‘rin olishi kutilayotgan eng muhim choralar Saudi Aramco neft giganti aksiyalarining birjaga birlamchi joylashtirilishi (IPO) hamda 2 trillion dollardan ortiq aktivga ega bo‘ladigan jahondagi eng yirik milliy farovonlik jamg‘armasining tashkil etilishidir. Hukumat huzuridagi iqtisodiy masalalar bo‘yicha kengash raisi, ikkinchi valiahd shahzoda Muhammad bin Salmon as-Saud Al Arabiya telekanaliga bergan intervyusida bu ikki chora rejaning eng muhim jihatlaridan bo‘lishini tasdiqladi.