O‘zbekistonlik Shahboz Xolmirzayev akademik eshkak eshish bo‘yicha Rio–2016 o‘yinlariga yo‘llanma oldi

Janubiy Koreyaning Chonju shahrida akademik eshkak eshish bo‘yicha XXXI yozgi Olimpiada o‘yinlarining yo‘llanmasi uchun Osiyo qit’aviy saralash musobaqasi o‘z nihoyasiga yetdi. Bu haqda O‘zbekiston Milliy olimpiya qo‘mitasi matbuot xizmati xabar bermoqda.

Qit’aning ko‘plab nomdor sportchilari ishtirokida o‘tgan mazkur nufuzli musobaqada O‘zbekiston vakili Shahboz Xolmirzayev oltin medal hamda Rio–2016 Olimpiada o‘yinlarining yo‘llanmasini qo‘lga kiritdi.

Shu tariqa, o‘zbekistonlik sportchilar tomonidan Rio–2016 o‘yinlariga qo‘lga kiritilgan yo‘llanmalar soni 71 taga yetdi. Shulardan 25 tasi paralimpiyachilarga tegishli.