Bag‘dod sharqidagi portlash oqibatida 10 kishi halok bo‘ldi, 40 kishi jarohat oldi

Bag‘dodning sharqiy tumanlaridan birida minalashtirilgan mashinaning havoga uchirilishi oqibatida kamida 10 kishi qurbon bo‘ldi, 40 kishi jarohat oldi. Bu haqda, Sky News Arabia telekanali reportajiga asoslanib, “TASS” xabar bermoqda.

Portlash al-Jadida tumanida joylashgan “al-Bayda” kinoteatri yaqinida sodir bo‘ldi.

Oxirgi kunlarda Bag‘dodda teraktlarning keti uzilmayapti: 24-aprel kuni sodir etilgan ikki terakt oqibatida 12 kishi halok bo‘ldi, 39 kishi jarohat oldi; 22-aprelda shia masjidiga uyushtirilgan xudkushlik hujumi qurbonlari soni to‘qqiz kishini tashkil etdi.