“Sog‘lom avlod uchun” xalqaro xayriya fondi tomonidan tashkil etilgan navbatdagi “Salomatlik poyezdi” Qoraqalpog‘iston Respublikasiga yo‘l oldi. Bu haqda O‘zA xabar bermoqda.
“Sog‘lom avlod uchun” xalqaro xayriya fondi va “O‘zbekiston temir yo‘llari” aksiyadorlik jamiyati hamkorligida tashkil etilayotgan “Salomatlik poyezdi” ekologik jihatdan noqulay sharoitda istiqomat qiluvchi aholi salomatligini muhofaza qilish, ijtimoiy jihatdan qo‘llab-quvvatlashda muhim omil bo‘lmoqda.
Navbatdagi “Salomatlik poyezdi”ning malakali mutaxassislari Nukus, Qo‘ng‘irot, Qoraqalpog‘iston, Jasliq stansiyalariga yaqin hududlarda istiqomat qilayotgan aholiga, shuningdek, fondning hududiy filiali ko‘chma tibbiy-ijtimoiy yordam brigadasi markaziy shifoxonalar, viloyat bolalar va tug‘ruq komplekslari hamda maxsus maktab-internatlariga tibbiy-ijtimoiy yordam ko‘rsatadi.
Tadbirni tashkil etishga “Dori-darmon” aksiyadorlik kompaniyasi, “Kitob olami”, Baxtteks-farm mas’uliyati cheklangan jamiyatlari, Nobel farm sanoat va Reka med farm qo‘shma korxonalari va xalqaro tashkilotlar yaqindan ko‘maklashdi. Tadbir davomida ijtimoiy ko‘makka muhtoj aholi va nogironlarga, tibbiy-ijtimoiy muassasalarga dori-darmon, gigiyena vositalari yetkazib beriladi.
Izoh (0)