Amur yo‘lbarslarining 12 tasi O‘zbekistonda yashaydi

Qirilib ketish arafasida bo‘lgani uchun “Qizil kitob”ga kiritilgan Amur yo‘lbarslarining soni 1940-yillarda 30—40 dona qolgan bo‘lsa, hozirga kelib birgina Uzoq Sharqdagi tabiiy sharoitlarning o‘zida bir necha yuztagacha ko‘paytirilgan. “Darakchi” gazetasi xabariga ko‘ra, Amur yo‘lbarslarning 12 tasi O‘zbekistonda yashaydi.

Toshkentda yashaydigan Navro‘z

Toshkent hayvonot bog‘ining ilmiy-ma’rifiy bo‘limi boshlig‘i Vladimir Golovanovning so‘zlariga ko‘ra, hozirda bu yerda yettita Amur yo‘lbarsi bor, ularning bemalol ko‘payishi, uchun barcha sharoitlar yaratilgan. 2016-yilgacha yo‘lbarslar soni oltita edi.

“Fevral oyi oxirida Moskva hayvonot bog‘idan 1,5 yashar yo‘lbars bolasi keltirildi. Qizig‘i, hujjatda uning laqabi yozilmagan ekan. Navro‘z bayrami yaqin qolgani uchun, yo‘lbarsvachchaga Navro‘z deya laqab berishni taklif qildim. Hozir Navro‘z laqabli Amur yo‘lbarsi Toshkentda o‘z uyidagidek yayrab yashayapti”, — dedi Golovanov.

“Termizlik” Ter va Miz

Toshkentdan tashqari, Termizdagi hayvonot bog‘ida ham Amur yo‘lbarslari parvarish qilinadi.

“Hayvonot bog‘imizda beshta Amur yo‘lbarsi yashaydi, — deydi Termiz hayvonot bog‘i direktori Chori Sattorov. — Ulardan biri bolalaganida, Termiz shahri sharafiga bittasiga Ter, ikkinchisi esa Miz deb nom berganmiz”.