Yaponiyaning Kyusyu orolidagi kuchli zilzilada 9 kishi qurbon bo‘ldi

Yaponiyaning janubi-g‘arbiy oroli — Kyusyuda sodir bo‘lgan kuchli zilzila natijasida to‘qqiz kishi halok bo‘ldi, mingdan ziyod kishi jabrlandi, ular kasalxonalarga yetkazildi, deb yozadi “TASS”. Ulardan 53 nafari og‘ir jarohatlangan.

Kumamoto prefekturasidagi Kibogaoka kasalxonasida yotgan 117 nafar bemor bino qulashi xavfi tufayli, eng yaqin oradagi maktabga evakuatsiya qilindi. Bu yerda jami 44 mingdan ortiq kishi evakuatsiya qilindi, ular maktab va jamoatchilik muassasalarida maxsus tayyorlangan 505 ta joyga ko‘chirildi.

Kyusyu orolidagi 6,5 magnitudali zilzila ushbu tumandagi yerosti zarbalari tarixidagi eng kuchlisi bo‘ldi.

Qutqaruvchilar ma’lumotlariga ko‘ra, xarobalar ostida kamida besh kishi qolmoqda.