Arbitraj sudi Federal antimonopoliya xizmatiga qarshi berilgan da’voni qondirishdan bosh tortgach, Google bundan norozi bo‘lib shikoyat arizasi berdi, deb yozadi “Vedomosti” internet-kompaniya vakiliga tayanib.
“Biz keyingi sud instansiyasiga apellyatsiya topshirdik. Biz, shuningdek, Rossiya hukumati bilan hamkorlik qilishda va Android ekotizimi qanday ishlashini tushuntirishda davom etmoqdamiz”, — dedi u.
Amerika kompaniyasi 2015-yil dekabrida sudga murojaat qilib, Federal antimonopoliya xizmatining qarorini bekor qilishni so‘ragan edi. Gap shundaki u Google’ni Android operatsion tizimida ishlaydigan qurilmalardagi oldindan o‘rnatilgan dasturlar bozorida raqobatni buzishda aybdor deb topgan edi. O‘tgan yil oktabrida xizmat qonunbuzarlikni bartaraf etish — Google Play dasturlar do‘konini boshqa servislardan, jumladan, qidiruv tizimidan uzib qo‘yishni buyurgan edi.
Sud Google’ning Federal antimonopoliya xizmati bozorlar hajmini va o‘yinchilar ulushini noto‘g‘ri hisoblagani haqidagi dalillarini qabul qilmadi.
Moskva arbitraj sudi qaroridan so‘ng Federal antimonopoliya xizmati bozordagi ustunligini suiiste’mol qilganligi uchun, Google’ga nisbatan ma’muriy ish qo‘zg‘atdi. Kompaniya mobil dasturlar bozorida 2014-yilda olgan daromadining 1 foizdan 15 foizigacha miqdorida jarima to‘lashi mumkin.
Izoh (0)