AQSh davlat kotibi Jon Kerri jangovar harakatlar olib borish qoidalariga ko‘ra, Boltiq dengizidagi Amerika esminetsida o‘z ustidan xavfli masofada uchib o‘tgan Rossiyaning Su-24 bombardimonchilarini urib tushirish huquqi bo‘lganini ma’lum qildi, deb yozadi “Interfaks”.
Uning aytishicha, Rossiya samolyotlari manyovrini xavfli, gij-gijlovchi yoki, hatto, hujumga taqlid qiluvchi deb baholash mumkin.
Eslatib o‘tamiz, avvalroq Rossiyaning Su-24 bombardimonchilari va vertolyoti ikki marta Amerikaning Boltiq dengizidagi betaraf suvlardagi “Donald Kuk” esminetsiga juda yaqin masofadan uchib o‘tgan edi. Xavfli yaqinlashuvlardan biri esminets palubasidan Polsha qurolli kuchlari vertolyoti uchib ketmoqchi bo‘lganida sodir bo‘lgan. Parvozni bekor qilishga to‘g‘ri kelgan.
Amerika tomonidan hodisa yuzasidan xavotir bildirdi va Rossiya aviatsiyasi xatti-harakatini “professional va xavfsiz bo‘lmagan” deb atadi.
Rossiya mudofaa vazirligi rasmiy vakili esa Rossiya harbiy-kosmik kuchlari uchuvchilari barcha xavfsizlik choralariga rioya qilgan holda, AQSh kemasigacha borib, so‘ng ortga qayrilganini ma’lum qildi.
Izoh (0)